't Zeeuws dialect liekt meer en meer in de verhetelheid te raeke, mèr ik bin eihenwies 'enog om 't toch te bluuve spreke en schrieve. Ôk bin'k eihenwies 'enog om soms wè is anders te dienken as een aor, en dikkels een andere kiek op de wereld te ebben as andere mensen.
Daerom kun je op deze plek af en toe schriefsels over een eihenwieze blik op sommige diengen verwachte, mèr ôk Zeeuwse ver'aelen.
Mè 'k za meneihen eerst is even voorstelle.
Ik bin Jewannes, hebore en hetohe op en klein òfje errehes in de buurte van Ellesdiek. Dè doet m'n vaoder nog steeds z'n dieng op en rond de boerderië. Verder è 'k nog twêê broers en een zus, die ôk allemaele Jewannes êête, behalve m'n zus dan, want die êêt Jewanna. Mien vaoder 'ad ôk twêê broers, en ôk die êêten allebei Jewannes,
Dat zit naemelek zô: Bliekbaer is 't er errehes êêl lang heleje iets fout 'ehea in 't DNA van een êêl verre voorouder. Want zovarre as we wete is 't er hinêêne in de familie De Zeeuw die hoed neamen kan ontouwe. Dus om van 't êêle hedoe af te weze, êêten de De Zeeuwen van onze tak van de familie al eeuwen lang allemeale Jewannes. Behalve de meiden dan, die êêten Jewanna. Liekt verwarrend, mè je reakt er à vlug an hewoon.
Op deze pahina's beschrieve ik de belevenissen van de familie De Zeeuw.
Deze ver'aelen berusten dikkels op 99% waer'eit en 1% è'k er dan bie verzonne. Ôk à zou ut af en toe net zo hoed wè is andersom kunne weze…
Nog 'n opmerking tot slot: Het 'Zeeuws' bestaet eihenlek nie zo. Ieder durp of gat ei z'n eihen woorden voor diengen. Op 't êêne durp eten ze aerepels, in 't durp derneffen petaoten. Omda 'k in Hoes nè schole moest, kwam ik op de middelbare schole à in aanraking mee vele varianten van het 'Zeeuws'. Ik èbbe een vrouwe hetrouwd uut Walcheren, mee schoonfamilie uut Erremuue, dus de chaos is wat dà betreft wè kompleet. Van aolles pik je wat mee, dus 't zou zomè kunne da'k af en toe een typisch Erremuus naest een typisch Borssels woord in êên zin hebruuke. Excuuses dèvoe, ik bin bange dat ôk bie mien de hlobalisering à een bitje eit toeheslaehe…